About Us

Mera naam Husnain Raza hai, professionally main aik high-teck Web Development Company ko head karta hon, hamare clients US, Canada, UK, Australia main hain. Website Banane aur google ke search results main  website ko first page par lane main hamara makhsoos andaz aur  khas maharat hai.

mujhay stock market main trade karte hoye taqreeban 2 saal ho gai hain, buhat saare brokerage houses ke buhat saare dawoon ke bawajood mujhay is system main aik cheez ki kami nazar aati hai, woh hai “AASANI” ya “Simplicity”. mujhay herat hoti hai ke ham aik aisay mulk main rehtay hain jiska literacy buhat khench tan kar bhi sharmindgi ke siwa kuch nahi hai iskay bawajood, brokerage houses, TV baton ko itna complex “Mushkil” bana kar pesh karte hain ke Pakistan ka normal bashinda KSE indexes par siwai lal, hare rangon ke aur aur kuch nahi samajh sakta (lal hai kitna gira, hara hai kitna utha).

ye website meri aik adna se koshish hai apne pakistani bhaio ko high-teck information asaan alfaz samjhane ki, unhain aik aisay business se ro shanas karane ki jiss main koi apko gun point par lot kar nahi bhag sakta, koi bhata nahi mang sakta, aap khamoshi se ghar ki char diwari main, Pakistan ke kisi bhi khitay main ya overseas Pakistan KSE ke utar charhao par nazar rakhte hoye baa izat munafa kama sakte hain.

kisi bhi Stock Exchange main sab se zyada ahmiat information ki hai, news, updates, board meetings, research ki reports, tajziye, aur ye sari malomaat lohay ke capsules main daal kar di jati hai, dant toot jate hain samajh nahi aata kehna kia chah rahay hain, khareedain, bechain, kuch nahi karain, ya khareed kar 3/6 mahinay bhol jain.

meray profession main customer kay wapis anay ki (returning customer) ki bari ahmiat hai, uski buhat si wajohat hain, beharhal meray pass jo jadoo ki chari mujhay lagta hai ke hai woh Albert sahab ke is quote ki waja se hai.

Everything should be made as simple as possible, but no simpler.

Albert Einstein

har cheez ko itna Aasan banado ke uskay baad mazeed asan ki gunjaish na rahe

jab maine ye website shro ki thi us waqt mujay maloomat ka fuqdan nazar aya aur ab maloomat agar mil bhi rahi hai tu aam aadmi ki samajh se bahar hai. is website main meri yehi koshish hogi ke main rozana main jitni reports aur analysis ka mutala karta hon, is webiste ke visitors ke aasan alfaz main share take unhain guidence mil sake, aur berozgari aur afra tafree ke iss maashre main log apne mustaqbil ke liye kuch saving kar sakain.

main  dawat deta hon un tamam logon ko jo, stock ki maloomat ke liye dar badad bhatak chukay, ya maloomat na hone ki waja se nuqsan utha chukain, is website ki feed instemal karen aur apne stock ke faisay us information par len jo saaf aur asaan ho.

is website pare ane wali tamam updates ko fori email main hasil karne ke is link par click karain: (jaisay hi website par koi maloomat dali jaigi apko email mil jaigi is maloomat ko umoman update kehtay hain)

Updates E-mail main Fori Hasil Karain

 GUZARISH

main karachi stock market se wabasta  un buhat se professionals ko dawat deta hon jo mujh se buhat zyada behtar tareeqay se information ko samjhte hain aur forecast karsakte hain, is website par apni peshan goyan apne naam ke sath (ya bagher name zahir kiye)  publish karain,  ye karwan barhega tu fard taraqee karega aur fard se mashra tarqee karta hai.

agar aap is website par author banna chahte hain tu apna E-mail address aur Phone no. contact form fill karke hamain bhejain click here

Buhat Shukriya

Husnain Raza

Trader Karacih Stock Exchange